Շնորհավորու'մ ենք: Ձեր փոքրիկը մեկ տարեկան է: Այս տարիքում երեխաներն ավելի ակտիվ, հետաքրքրասեր և արտահայտիչ են: Ձեր երեխան կարող է սկսել բառեր արտասանել, ինքնուրույն կանգնել և մի քանի քայլ անել: Գրքեր կարդացեք փոքրիկի համար և ակտիվ խաղեր խաղացեք, որպեսզի օգնեք նրան սովորել ու զարգանալ:  

1 տարեկան երեխայի սոցիալական և հուզական զարգացման փուլերը

1 տարեկանում ձեր փոքրիկը սովորում է շփվել շրջապատի մարդկանց հետ.

• գիրքը մեկնում է ձեզ, երբ ցանկանում է հեքիաթ լսել,
• լացում է, երբ ծնողները գնում են,
• ամաչում է անծանոթ մարդկանցից,
• հանգնվելիս օգնելու համար պարզում է ձեռքը կամ ոտքը,
• ունի սիրելի խաղալիքներ,
• կրկնում է հնչյունները` ձեր ուշադրությունը գրավելու համար:  

Հուշումներ ծնողների համար

• Խաղացեք երեխայի հետ հաղորդակցական խաղեր, օրինակ`թաքցրեք ինչ-որ բան և հորդորեք, որ գտնի:
• Հագնվելիս խնդրեք, որ օգնի հանել ոտքը, կանգնել և այլն:

1 տարեկան երեխայի լեզվի զարգացման և հաղորդակցման փուլերը

Ինչպես է ձեր փոքրիկն արտահայտում իր կարիքները.

• օգտագործում է պարզ ժեստեր և ասում պարզ բառեր` «մամա» և «պապա»,   
• նրա թոթովանքն ավելի նման է խոսքի,
• պատասխանում է պարզ հարցերին,
• փորձում է կրկնել ձեր ասած բառերը:

Հուշումներ ծնողների համար

• Սովորեցրեք փոքրիկին ասել «բարև» և «հաջող»: Գովեք նրան, երբ ասում է, քանի որ դա կօգնի նրա սոցիալական և հուզական զարգացմանը:   
• Գովեք երեխային, երբ նա կրկնում է բառերը կամ փորձում է խոսել ուրիշների հետ:
• Գիրք կարդալիս խնդրեք նրան ցույց տալ հերոսներին և առարկաները: 

1 տարեկան երեխայի ուղեղի զարգացման փուլերը

Ձեր երեխայի ուղեղը զարգանում է.

• նա ընդօրինակում է շարժումները և ժեստերը, 
• հարվածում է առարկաները իրար,
• խմում է բաժակից և ճիշտ է գործածում այլ առարկաները,
• գտնում է պահված իրերը,
• որևէ առարկայի անունը տալիս նայում է այդ առարկային,
• կարող է հետևել պարզ ուղղություններին և բռնել առարկաները առանց օգնության, 
• առարկաները կարող է դնել արկղերի մեջ և հանել:

Հուշումներ ծնողների համար

• Օգնեք և ուղղորդեք ձեր փոքրիկին, երբ նա խաղ է խաղում:
• Հենց որ նկատեք, որ երեխան հմտանում է և կարողանում է որոշ բաներ ինքնուրույն անել, աստիճանաբար պակասեցրեք օգնությունը` շարունակելով հետևել և ուղղորդել:

1 տարեկան երեխայի շարժումների և ֆիզիկական զարգացման փուլերը

Ինչպես է երեխան շարժվում իր միջավայրում.

• կարող է առանց օգնության մի քանի քայլ անել,
• նստում է առանց օգնության,
• բարձրանում, կանգնում և քայլում է կահույքից բռնվելով:

Հուշումներ ծնողների համար

• Փորձեք երեխային դնել հարթ մակերեսի վրա, որպեսզի օգնեք նրան զարգացնել մկանները, օրինակ` չոչ անելով, ոտքերն ու ձեռքերը շարժելով: 

1 տարեկան երեխայի սննդի և կերակրկման փուլերը

1 տարեկան երեխայի կերակուրները

• սնունդն ավելի բազմազան է, օրինակ` եփված փափուկ բանջարեղեն, փափուկ մրգեր, 
• սովորում է ինքնուրույն ուտել,
• կարողանում է լավ ծամել ուտելիքը,
• աստիճանաբար կարողանում է խմել բաժակից:

Հուշումներ ծնողների համար

• Երեխային օրական հինգ անգամ տվեք կես բաժակ սնունդ` երկու առողջարար նախաճաշիկների հետ միասին:
• Շարունակեք կրծքով կերակրել, եթե երեխան ուզում է:

Ինչին պետք է ուշադրություն դարձնել

Երեխաները տարբեր ձևով են զարգանում, սակայն խորհրդակցեք մանկաբույժի հետ, եթե ձեր 1 տարեկան երեխան. 

• չոչ չի անում,
• չի փնտրում թաքցրած առարկաները,
• չի կարողանում կանգնել առանց օգնության,
• մատով ցույց չի տալիս,
• չի ասում պարզ բառեր,
• կորցնում է նախկինում բերված հմտությունները: