Թեև երեխաները ծնվում են մոր կուրծքը փնտրելու ռեֆլեքսով, շատ մայրեր աջակցության կարիք ունեն՝ երեխային կրծքով կերակրման համար դիրքավորելու, երեխան կրծքին ճիշտ դնելու համար: Կրծքով կերակրումը թե՛ մայրերից, թե երեխաներից ժամանակ ու վարժանք է պահանջում։

Որպեսզի թե՛ դուք, թե՛ երեխան առավելագույնս շահեք կրծքով կերակրումից, ներկայացնում ենք որոշ դիրքեր (գոյություն ունեցող բազմաթիվներից), որոնք կարելի է փորձել։ Հիշեք, որ ամենակարևորն այն է, որ ձեր երեխան լավ սնուցվի: Կարող է մի քանի փորձ պահանջվել՝ նախքան երկուսիդ համար լավագույն տարբերակը գտնելը։

Կրծքով կերակրելու վերաբերյալ հարց կամ մտահոգություն ունենալու դեպքում անպայման խոսեք մանկաբարձի, լակտացիայի գծով մասնագետի կամ այլ բուժաշխատողների հետ։

Խորհուրդներ կրծքով կերակրման համար

Կուրծքը լավ բռնելու նշաններ

• Հարմարավետության զգացում՝ առանց որևէ ցավի
• Արեոլան (հարպտկային շրջանը) ավելի շատ տեսանելի է երեխայի բերանի վերևի, քան ներքևի մասում
• Երեխայի բերանը լայնորեն բացված է
• Ստորին շուրթը հետ է ծալված
• Ծնոտը հպվում է, կամ գրեթե հպվում է ձեր կրծքին

Լավ դիրքավորման նշաններ

• Երեխայի գլուխն ու մարմինը մի գծի վրա են։ Եթե երեխայի գլուխը թեքված է կամ ծուռ է դրված, ապա երեխան դժվարությամբ է կուլ տալիս կամ ծծում:
• Ձեր երեխայի մարմինը մոտ է ձեր մարմնին. երեխան չի կարող լավ հարմարվել կրծքին, եթե մարմնով ձեզ կպած չէ։
• Ձեր երեխայի ամբողջ մարմինը հենված է ձեր ձեռքին՝ երեխայի մեջքի երկայնքով: Սա կարևոր է հատկապես նորածնային տարիքում և այն երեխաների համար, ովքեր դեռ ինքնուրույն նստել չեն կարող։ Ավելի մեծ տարիքի երեխաների դեպքում մարմնի միայն վերևի մասը պահելը լիովին բավարար է։
• Ձեր երեխան կրծքին մոտենում է քթով դեպի պտուկ գնալով, որպեսզի կրծքին պտուկի ներքևի մասից մոտենա։

Արդյունավետ կլման նշանները

• Երեխան դանդաղ, խորը ծծում է կաթը, երբեմն դադար առնելով։
• Մեկ կամ երկու անգամ ծծելուց հետո կարող եք տեսնել կամ լսել երեխայի կլման ձայնը։
• Երեխայի կաթ ուտելու ընթացքը հարմարավետ է և ձեզ ցավ չի պատճառում։
• Երեխան ավարտում է ուտելը, բաց է թողնում կուրծքը և բավարարված ու հանգիստ տեսք ունի։
• Կերակրելուց հետո ձեր կուրծքը փափուկ է։

Մաշկը մաշկին շփման առավելությունները

• Հանգստացնում և թուլացնում է թե՛ ձեզ, թե՛ երեխային։
• Մաշկը մաշկին շփումը կարգավորում է երեխայի ջերմաստիճանը, սրտի զարկերը և շնչառությունը։
• Այն խթանում է մարսողությունը և հետաքրքրությունը կերակրման նկատմամբ։
• Ապահովում է պաշտպանություն վարակներից։

Կրծքով կերակրման դիրքերը

Վայելե՛ք ձեր երեխային կերակրելու և փոխադարձ կապի ձևավորման այս հատուկ պահերը։ Եվ հիշե՛ք, որ կրծքով կերակրման հմտության զարգացումը ժամանակ է պահանջում։ Համբերատար եղեք ինքներդ ձեզ հանդեպ և անհրաժեշտության դեպքում դիմեք բուժաշխատողի օգնությանը։