Skip to main content

ԲԵՅԲԻՍԵՖ

Ծնողներին անհրաժեշտ վստահելի տեղեկատվությունը հայերեն

Հարթակի մասին

Երեխայի իրավունքների կոնվենցիայի 30-ամյակի և Հայաստանում ՅՈՒՆԻՍԵՖ-ի աշխատանքի 25-ամյակի առիթով մենք սկսեցինք այս գործընթացն ու առողջապահության նախարարության հետ համատեղ ստեղծեցինք այս հարթակը մի պարզ պատճառով՝ որպեսզի աջակցենք բոլոր ծնողներին ու խնամակալներին ապահովել իրենց երեխաների կյանքի լավագույն սկիզբը:

Առաջին 1000 օրը անկասկած երեխայի կյանքի կարևորագույն շրջանն է: Կյանքի առաջին 1000 օրը, որ ներառում է ներարգանդային զարգացման 9 ամիսը և ծնունդին հաջորդող 2 տարին, կանխորոշում է անհատի առողջական հեռանկարները հետագա ողջ կյանքի համար։ Կյանքի հենց առաջին տարիների ընթացքում է երեխայի ուղեղը զարգանում այլևս երբեք չկրկնվող արագությամբ: Այս շրջանը ողջ կյանքում եզակի մի հնարավորություն է երեխայի սովորելու ու զարգանալու համար: Իսկ յուրաքանչյուր երեխայի ճիշտ զարգացման համար անհրաժեշտ է ՍՆՈՒՆԴ, ԽԱՂ, ԽՆԱՄՔ ու ՍԵՐ: Ու հենց ծնողներն են հիմնականում կազմակերպում երեխայի սնուցումը, ապահովում նրա զարգացումը և փորձում ամեն կերպ պաշտպանել նրանց:

Ծնող լինելն աշխարհում ամենաբարդ գործն է: Բայց շատ ծնողներ չեն ստանում բավարար աջակցություն ու չեն կարողանում իրենց երեխաների հետ բավարար ժամանակ անցկացնել: Երեխայի խնամքի վճարովի արձակուրդները, կրծքով կերակրելու համար տրամադրվող ընդմիջումները ու պայմանները և ընտանիքների աջակցությանն ուղղված այլ քաղաքականությունները բազմաթիվ ծնողների համար իրականություն չեն:

Երեխային մեծացնելը մեկ մարդու կամ անգամ երկու մարդու գործ չէ: Ծնողներին աջակցություն է պետք: Ահա թե ինչու ենք մենք ստեղծել այս հարթակը, որտեղ ծնողները կարող են գտնել վստահելի տեղեկատվություն երեխայի խնամքի, սնուցման և դաստիարակման վերաբերյալ: Սա պետք է օգնի յուրաքանչյուր ծնողին յուրաքանչյուր երեխայի վաղ մանկական զարգացումն ապահովելու գործում:

Երեխայի իրավունքների մասին կոնվենցիան սահմանում է երեխայի սննդի և մաքուր ջրի, որակյալ առողջապահական ծառայությունների, խաղի, կրթության և մի շարք այլ իրավունքներ, որոնք պետք է իրացվեն, որպեսզի երեխաները զարգացնեն իրենց ողջ ներուժը: 

ՅՈՒՆԻՍԵՖ-ի մասին

ՅՈՒՆԻՍԵՖ-ը (ՄԱԿ-ի մանկական հիմնադրամը) երեխայի իրավունքների գծով համաշխարհային առաջատարն է, որի գործունեության նպատակն է՝ յուրաքանչյուր երեխայի համար ամենուրեք ապահովել հավասար հնարավորություններ՝ հատուկ ուշադրություն դարձնելով ամենակարիքավոր և խոցելի երեխաներին: 

ՅՈՒՆԻՍԵՖը Հայաստանում աշխատում է 1994 թվականից: Այս տարի մենք տոնում ենք Հայաստանում մեր գործունեության 25-ամյակը: Մենք աջակցում ենք ՀՀ կառավարությանը՝ մշակել և իրագործել բարեփոխումներ, որոնք կբարելավեն յուրաքանչյուր հայ երեխայի կյանքը՝ հատուկ ուշադրություն դարձնելով ամենակարիքավոր և խոցելի երեխաներին:

Վերջին 25 տարիների ընթացքում ՅՈՒՆԻՍԵՖ-ի աջակցությամբ և առողջապահության նախարարության հետ համատեղ աշխատանքի շնորհիվ Հայաստանում.

  • Կիսով չափ կրճատվել է մանկական մահացությունը մինչև 5 տարեկան երեխաների շրջանում:
  • Վերացվել է մորից երեխային ՄԻԱՎ-ի փոխանցումը:
  • Հայաստանը ճանաչվել է պոլիոմիելիտից ազատ գոտի:
  • Աղի համընդհանուր յոդացման արդյունքում վերացվել է օրգանիզմում յոդի անբավարարությունը:

Ցավոք, դեռ շատ աշխատանք կա անելու. շատ երեխաներ անտեսվում են ու հետ են մնում՝ չկարողանալով ստանալ իրենց բնականոն զարգացումն ապահովելու համար բավարար առողջ սնունդ, ճիշտ  խնամք ու որակյալ կրթություն: Մենք շարունակում ենք աշխատել, որպեսզի յուրաքանչյուր երեխա լինի սիրված, պաշտպանված, առողջ ու կրթված, որպեսզի յուրաքանչյուր երեխա ունենա լավ մանկություն ու կարողանա հասնել իր ողջ ներուժին: Մենք շարունակում ենք աշխատել ու մենք երբեք չենք հանձնվում:

Լրացուցիչ տեղեկությունների համար այցելե՛ք ՅՈՒՆԻՍԵՖ-ի կայք:  

Հետևե՛ք ՅՈՒՆԻՍԵՖ-ին ՖեյսբուքումԹվիթերումԻնստագրամում և Յութուբում