1. Միանվագ դրամական աջակցության ծրագիր

Մարզային բնակավայրերում հիփոթեքային վարկով բնակարան ձեռք բերելու կամ անհատական բնակելի տուն կառուցելու համար տրամադրվում է միանվագ դրամական աջակցություն, որն ուղղվում է կանխավճարի ֆինանսավորմանը։ 

Պայմանները՝

• ընտանիքում առկա է առնվազն 2 անչափահաս երեխա
• բնակելի անշարժ գույքը ձեռք է բերվում 2020 թվականի հուլիսի 1-ին կամ դրանից հետո, և անհրաժեշտ տեղեկությունները նախարարություն են ներկայացվում նախքան վարկային պայմանագրի կնքումը,
• անշարժ գույքի ձեռք բերվող և գնահատվող շուկայական առավելագույն գինը՝ 30 մլն դրամ (3-րդ երեխայի դեպքում՝ 35 մլն, 4-րդի դեպքում՝ 40 մլն և այլն)
• կատարվող կանխավճարի նվազագույն չափը՝ անշարժ գույքի արժեքի առնվազն 10%
• Սեփականության իրավունքը գրանցվում է շահառուի և նրա ամուսնու անունով։

Աջակցության չափը՝

• անշարժ գույքի արժեքի 5%, բայց ոչ ավելի, քան 1 մլն դրամը, որին ավելանում է 3-րդ և հաջորդ յուրաքանչյուր երեխայի համար ևս 5%, բայց ոչ ավելի, քան 500,000 դրամ
• անհատական բնակելի տուն կառուցելու նպատակով փաստացի ստացած վարկի 10%, բայց ոչ ավելի, քան 1 մլն դրամը, որին ավելանում է 3-րդ և հաջորդ յուրաքանչյուր երեխայի համար ևս 10%, բայց ոչ ավելի, քան 500 000 դրամ։

Եթե շահառուի տարիքը չի գերազանցում 30 տարին, աջակցությունն ավելացվում է 30%-ով:

2. Կանխավճարի ապահովագրության ծրագիր

Հիփոթեքով բնակարան ձեռք բերող շահառուին տրամադրվում է դրամական աջակցություն՝ տարեկան ապահովագրական վճարը վճարելու համար։

Պայմանները՝

• ընտանիքում առկա է առնվազն 1 անչափահաս երեխա
• բնակելի անշարժ գույքը ձեռք է բերվում 2020 թվականի հուլիսի 1-ին կամ դրանից հետո, և անհրաժեշտ տեղեկությունները նախարարություն են ներկայացվում նախքան վարկային պայմանագրի կնքումը
• անշարժ գույքի ձեռք բերվող և գնահատվող շուկայական առավելագույն գինը՝ 30 մլն դրամ (3-րդ երեխայի դեպքում՝ 35 մլն, 4-րդի դեպքում՝ 40 մլն և այլն)
• կատարվող կանխավճարի նվազագույն չափը՝ անշարժ գույքի արժեքի առնվազն 10%։

Աջակցության չափը՝

Տարեկան ապահովագրական վճարի 90%, բայց ոչ ավելի, քան տարեկան 180,000 դրամ։

3. Երեխայի ծննդյան աջակցության ծրագիր

Հիփոթեքային վարկ մարող ընտանիքում երեխա ծնվելու դեպքում տրամադրվում է միանվագ դրամական աջակցություն, որն ուղղվում է հիփոթեքային վարկի մայր գումարի մարմանը։

Պայմանները՝

• Երեխան ծնվել է 2020 թվականի հուլիսի 1-ին կամ դրանից հետո (մինչև երեխայի 1 տարին լրանալը)
• Անշարժ գույքի ձեռք բերվող և գնահատվող շուկայական առավելագույն գինը՝ 30 մլն դրամ (3-րդ երեխայի դեպքում՝ 35 մլն, 4-րդի դեպքում՝ 40 մլն և այլն)
• Դիմելու օրվա դրությամբ առկա է առնվազն 12 ամիս մարում
• Վերջին 12 ամիսների ընթացքում ուշացումների ընդհանուր քանակը չի գերազանցում 30 օրացուցային օրը։

Աջակցության չափը՝

• 1-ին և 2-րդ երեխայի դեպքում՝ վարկի մնացորդային մայր գումարի 10%, Երևան քաղաքում՝ 5%, բայց ոչ ավելի, քան 500,000 դրամ
• 3-րդ և հաջորդ երեխայի դեպքում՝ վարկի մնացորդային մայր գումարի 50%, Երևան քաղաքում՝ 25%, բայց ոչ ավելի, քան 2 մլն դրամ
• Եթե շահառուի տարիքը չի գերազանցում 25 տարին, ապա 1-ին և 2-րդ երեխայի դեպքում՝ վարկի մնացորդային մայր գումարի 15%, Երևան քաղաքում՝ 8%, բայց ոչ ավելի, քան 1,5 մլն դրամ
• Եթե շահառուի տարիքը չի գերազանցում 30 տարին, ապա 3-րդ և հաջորդ երեխայի դեպքում՝ վարկի մնացորդային մայր գումարի 70%, Երևան քաղաքում՝ 35%, բայց ոչ ավելի, քան 4 մլն դրամ
• Միաժամանակ մեկից ավելի երեխա ծնվելու դեպքում աջակցության չափը հաշվարկվում է ըստ ծնված երեխաների քանակի։

Միանվագ դրամական աջակցության և կանխավճարի ապահովագրության ծրագրերից օգտվելու համար շահառուն դիմում է նախարարության հետ պայմանագիր կնքած բանկ կամ վարկային կազմակերպություն։ Երեխայի ծննդյան աջակցության ծրագրի դեպքում, եթե բանկը նախարարության հետ չի կնքել պայմանագիր, ապա տրամադրում է տեղեկանք հիփոթեքային վարկի և մնացորդային գումարների վերաբերյալ, որը շահառուն, այլ անհրաժեշտ փաստաթղթերի հետ, ներկայացնում է Աշխատանքի և սոցիալական հարցերի նախարարություն։